عصفور سطح، لفريد بوغدير

السينما في تونس حضبة وشدان صف، دزني وندزك وعرق شرتلة وها الجنش طولو طولين وعرضو عرضين واقف في الباب يقحر للعباد ويعدي فيهم بالواحد بالواحد، حتى لين يغمزو عرفو من شباك التساكر ويقل لو كومبلي بات الرزق، ولداخل، ما تكمل الفرجة كان بقرطاس القلوب وسطل العبيدية وساعات لقطات حيّة من فيلم أبي فوق الشجرة.

صورة من صور سينما الكوليزي في أيام قرطاج السينمائية، الصورة هذي تخليك تفكر ألف مرة قبل ما تطيّح قدرك وتخليك تسأل: علاه احنا هكة،  تجبد تصويرة قديمة متع تونس أربعين سنة لتالي، تقول وين مشاو الناس هاذم وعلاه خلاو بلاصتهم للفوضى والتبلبيز، باب بحر والشوارع اللي دايرين بيه كانوا مهرجانات ثقافة على طول العام وين تمشي ما تلقى كان الكتب والجرائد والاسطوانات، في دواير المسرح البلدي الممّو متع الثقافة التونسية تلقاهم حاطين الحطة كل عشية في قهوة باريس والا الفلورونس والا رواق يحيى للفنون بحذا البالماريوم، منامة عروسية، صورة زمنية ما يعرفوهاش أولاد مفيدة اللي تربّاو في  حوانت الشاوارما وحلو عينيهم على نصب العظم المروّب والملاوي.

زوز م الناس هاك النهار يتناقشوا ، واحد منهم آخر فيلم شافو هو “عصفور سطح” اللي تعدا عندو خمسة وعشرين سنا لتالي، موش هذا المشكل، المشكل أنو يفتي وموش عاجبتو السينما التونسية يعتبرها سينما الكاسة والحمام، كليشيه يخدمو عليه جماعة اكبس من هاك العام. الجماعة اللي لو كان تحللهم في العريض شوية توة يقولولك السينما حرام.

اللي يحب السينما يحب الحياة هذاك علاه برشة ناس شايخين على المشاكل التنظيمية في أيام قرطاج السينمائية، لأنها تتماشى مع رؤيتهم الظلامية واللي تتلخّص في كلمة وحدة: اش نعملو بيها السينما؟

محمد جمور يصافح راشد الغنوشي

حزب الوطنيين الديمقراطيين عمل بيان مستعجل، عبر فيه على استياءو من نشران حركة النهضة تصويرة القيادي في الحزب محمد جمور يصافح في راشد الغنوشي. وفسر لأتباع حزبو بش ما يفهموش وضعية التلبس هذي بالغالط، أنو تلاقى هو والشيخ صدفة في السفارة الألمانية في الاحتفالات بعيد ألمانيا الوطني،  وانو اخلاقو ما تسمحلوش بش يتعدى ويعمل روحو ما شافوش.

بش نفهمو السياق مليح الوطد موش مختلف فقط مع  النهضة لأنها تمثل الإسلام السياسي اللي هو ضدو لكن كذلك لأنو يعتبر الترويكا ما تحاسبتش والدوسيات محلولة وملطخة بالدم، من جهتها حركة النهضة تصنف الوطد يسار استئصالي وفك ايدي من شوشتك.

صورة المصافحة والبيان ما ينجمو كان يخيبو الظن ويخليو ابسط مواطن يزيد يكفر بالسياسة و يقول: توة هذا فاش لاهين؟  لا خير في اللي ماشي في بالو جاب الصيد من وذنو بها التصويرة وبش يدخل الوطد بعضو كيف ما فتق أحزاب أخرى من بعضها ولا خير في اللي طاح للعبة وهبط مستواه. حكاية فارغة،

الوضع الصحيح في الديمقراطيات يقوم على الاختلاف بين الأحزاب في التصورات والبرامج ، هذاك علاه تفرح كيف تلقى اليسار في تونس يعارض التوجه الرأسمالي لبقية الأحزاب اللي يغنيو في غناية وحدة كيف المجموعة الصوتية وراء صندوق النقد الدولي، والاتحاد الأوربي،

والناس عاقدة النوارة في المعارضة لأنها تحكي بلغة أخرى تنجم تكون تحلم لكن ما يسالش الحلم ضروري للناس بش يتنفسو

اهمية التصويرة موش في المصافحة بين الإسلامي والماركسي لكن في وجودهم مع بعضهم في عيد جمهورية ألمانيا، هكة تتقرا التصويرة ورمزيتها وتخلي الناس يقولوا  الطبقة السياسية تفرقها الكراسي وما توحدها كان السفارة الأمريكية والا الألمانية.
اش لز حمة يغني؟

سوق الملابس المستعملة في تونس

الفريب خط أحمر الناس الكل مللي سمعو بقرار منع استيراد الملابس المستعملة وخصوصا النساء وهوما يحضرو في ارواحهم للثورة 2.0 اللي برشة ناس تستنى فيها بش تركب عليها ، برشة ناس من اللي فاتتهم الثورة الأولى ما لقاوش فيها بلاصة، والا ركبو على بكري وهبطتهم الانتخابات.
لكن ما تخافوش أزمة الفريب كيف ازمة الكيوسكات و أزمة قرقنة وبرشة أزمات أخرى تحكم فيها مفاوضات اللحظة الأخيرة، تشويق وشدان انتباه وحرب أعصاب، ومن بعد تتحل

مفاوضات اللحظة الأخيرة  تبدا م الصباح  وتفوت نصف الليل، بعد ما توفى الآجال والإضراب يولي من تحصيل الحاصل، المتفاوضين يتعبو وعينيهم تتسكر وأعصابهم تترخى بالنوم وكل واحد فيهم يتمرج بالتاليفونات مرتو تطلب فيه، اية وينك روحتش كملتش ها المفاوضات اولادك يتعاركو جيب خبزة، مثبت اللي انت مع الوزير الى آخره من هاك الجو متع حراير تونس، وقتها بالضبط يوصلو الجماعة للحل ويتفض المجلس ويا ناس ما كان باس وتصبح البلاد رايضة وننساو الحكاية.

فيلم قديم، كيف هاك الأفلام اللي تعديها التلفزة في المناسبات شوية ميلودراما على شوية غناء وشطيح على شوية ضغوطات فيسع ما تتنسى على شوية قضايا ولجان تحقيق كيف الروقارات حاشاكم تتحل وما تتسكرش، نهار اثنين يطلعلنا وزير يحكي على تراجع النمو وارتفاع المديونية وعلى بارونات التهريب والإجراءات الموجعة اللي نسمعو بيها وما ريناهاش والناس الكل تستنى في راس الشهر، كيف هاك المشهد الأخير متع أبطال الفيلم ماشيين جايين قدام غرفة العمليات لين يخرج الطبيب وهو ينشف في يديه ويقلهم الشهر هذا هاو دبرناهالكم الشهر الجاي شوف وشوف.

هز ساق تغرق الآخرى، البلاد ماشية بالقدرة وما كذبش اللي قال شادينها أولياء الله الصالحين.

زيارة والي نابل الفجئية لبلدية الحمامات

زيارة والي نابل لبلدية الحمامات والتوبيخ اللي عملو للموظفين أكيد بش يعجب برشة ناس يحبو الدولة تحمر عينيها لكن المسألة ما تفرحش ياسر.

شنية الحكاية هي، الوالي ما عجتوش لبسة الموظفين لأنهم يمثلوا الدولة وطلب من المسؤولين الكبار في البلدية يهبطو منشور ويمنعوا أي موظف من حطان ساقو في الخدمة اذا ما كانش في مظهر لائق.

اش كون ما تعجبوش الحكاية هذي؟

أنا نرى اللي المشهد هذا فيه برشة استغلال نفوذ واذا حبينا نلطفوها شوية نقولوا افراط في استعمال النفوذ وهذي مشكلة برشة موظفين عموميين في تونس، أحيانا عون الحرس والا الشرطة  يوقف كرهبة مولاها عامل مخالفة، يشوفلو اوراقو، في عوض مباشرة يطبق القانون ويعمرلو الخطية يحلو محاضرة في الأخلاق حتى لين يمشي معاه في الثنية  ويبدا يرخص في روحو  سامحني عندك حق انا غالط أية عديهالنا المرة هذية وماعادش نعاود صنعتي.

في الدول المتقدمة علينا، قتال الأرواح، ماعندكش الحق تصورلو وجهو، القانون يعاقبو على عملتو ولكن يحفظلو  حقوقو، أما احنا عندنا ثقافة الشوهة، والفضيحة والشماتة هذاك علاه الموظف اللي هندامو ما عجبش الوالي وقع اذلالو والتشهير بيه.
زيارة الوالي تنجم تكون باهية أما تصويرها بالفيديو من غير تغطية وجوه الموظفين اعتداء صارخ على حقوق المواطن الأساسية وتعدي على حرمتو لكن احنا مع الأسف حقوق الانسان اختصرناها في  عمليات التعذيب داخل السجون ومراكز الايقاف وما نجمناش نردوها ثقافة كاملة وتتقرا حتى في المدارس.

نزيدك زيادة مشهد الوالي وهو يكش وينش في البلدية يذكرنا بزيارات بن علي الفجئية في بداياتو. وما نتصورش اللي هيبة الدولة يلزمها بالضرورة تساوي الخوف والذل؟ ولذلك سيد الوالي قبل ما نحسنو الهندام هات نغيرو العقلية.

تصريحات أسامة الملولي  بخصوص  مقابلتو للشيخ راشد الغنوشي بعد ما رجع م الألعاب الأولمبية تدخل في باب الحرية الشخصية، لكنها في تعطينا فكرة على كيفية الانخراط في الأحزاب السياسية.
في الحقيقة وقت اللي كان عنا حزب واحد في البلاد الأمور كانت أسهل من هكا، ماكانش مطلوب منك تمشي للحزب، الحزب هو اللي يجيك، وحتى كان ما عندكش فلوس تدفع حق الانخراط يدفعو عليك، الشعب المهنية ماكانتش مقصرة. في عقلك يصبرو عليك.

راشد الغنوشي يستقبل أسامة الملولي

وانت بطبيعتك ماكش صاحب مشاكل وتمشي الحيط الحيط تشترك في شعبة الخدمة وتزيد احتياطيا تشترك في شعبة الحومة على ما يأتي اشكون يعرف ع البلا. واشكون يعرف على استُفيد.

السياسة كانت ساهلة، موش مطلوب منك تعرف أي شيء ع الحزب، المهم الحزب هو اللي يعرف عليك كل شيء ، اش تاكل، اش تشرب، وقتاش تقوم، وقتاش ترقد، قداش تحط من طابع سكر في القهوة وقداش لازمك وقت بش تشربها، مالا!
في المقابل، الحزب ما يطلب منك شيء، فقط تحلّ عينيك  ووذنيك على قد ما تقدر وتكون حاضر في المعامع الكبيرة، في استقبالات سيادتو مثلا م الفجاري تشري جريدة بش تقصّر الوقت وكسكروت ودبوزة ماء، وتفك بلاصتك في كار الكبانية مع المناضلين الصحاح، متع رفع التحديات والشوالق وتمدّ وجهك في الصف الأول منين يتعدى سيادتو وياقف للماجورات والطبّالة.

الناس كرهت السياسة م الانتهازية، اما اليوم كل شيء تبدّل، الأحزاب كثرت وكل حزب عندو ثنية، كان عندك توندونس قومية عليك بجمال عبد الناصر والقضية الفلسطينية، كان عندك توندونس شيوعية عليك باللحية والدنقري والبيرية، كانك م المناضلين الصحاح اللي هراتلهم سراولهم كيران الكبانية، احفظ قصار السور وطلع البدر علينا وارقد في الثنية.

المطر صبّت، والقمم فاضت، الشوارع تِمْلات، والكراهب غرقت، الديار في الحوم الواطية تعبّات بالماء، وها اللي هبط يعفّس ويرفّس في الميلوسي ويلعن في الطاسيلة والفاصيلة وهاك الصغير كرتابلتو على ظهرو، رماتو الموجة وما لحقو عليه كان بعد عشرين ميترو سباحة حرة،  سوسة قابادجي، باب الجديد، باب بحر، ترويكاديرو، سيدي بوجعفر، المستير العقبة، صقانس، الغدير. وللا بية خارجة م الحمام سخونة تفور صحا صحا.

هذي غسّالة النوادر كيف العادة والعوايد، ربي يعطي خيرو ، والأرض تطرشق بالضحك على الناس اللي غرقت في الكذب والنفاق والميزيريا.

مطرة سبتمبر معروفة تعمل هذا وأكثر، ما تبدلت كان لغة الناس والتلافز، قبل مايحدثوك كان ع المساعدات اللي بعثها سيادتو للمناطق المنكوبة وعلى بطانيات التضامن الاجتماعي، الناس الكل تفرش بش تلقى ما تتغطى، العزوزة هازها الواد وهي تضحك قدام الكامرا متع اخبار الثمنية وتقول العام صابة والمواطن الزوالي اللي حاير في شريان خبزة وموش عارف كيفاش بروح لدارو ياقف قدام العلم المعلق فوق حانوت الشعبة ويحكيلك ع الثلج كيفاه يغذي المائدة المائية العميقة ومرتو بحذاه تزغرط.

الناس الكل تحكي ع البنية التحتية المضعضعة في البلاد ولا واحد تحدث على البنية الفوقية المهسهسة بنية العقل والكمباص. بنية المخ والتفكير

الحكاية ساهلة اما الناس تتكلم بالصعيب، قنوات التطهير قديمة وضويقة وما نظفوهاش اما حتى الزبلة ودبابز البلاستيك اللي تجرها المطر ما عندك فيها ماتقول،  وفي حالة الكوارث الطبيعية ماذا بيه الواحد يشمر على ذراعو ويسيب صالح شوية، لكن احنا الكل ولينا خبراء في البنية التحتية، و تخطيط المدن والنمو الديمغرافي والمواصفات العالمية ، على خاطر احنا نظاف وباهين واللي حكمونا الكل من عهد لمين بي سراق وخايبين. يعجبكشي؟

ليلة السابع عشر من جانفي 1991 واصل التلفزيون التونسي تقديم برامجه بلا انقطاع، تابعت نشرات الأخبار لحظة بلحظة أنباء قصف بغداد وحقّقت إنجازا مهنيا ستظلّ الذاكرة تتباهى به لسنوات. ارتفعت في يوم وليلة نجومية الصحفيين الذين كانوا يقدمون أخبار الحرب وكان بعضهم يرتجلون أحيانا بقدرة فائقة ترجمة البرقيات التي تصل إلى الأستوديو ولا تحتمل الانتظار، كان ذلك نجاحا مميزا، ولا أحد يعرف على وجه التدقيق كيف اتُّخذ هذا القرار الجريء؟ ولكنْ بصرف النظر عمّا يمكن أن يكون قد وقع حقّا في كواليس تلك الليلة بين الإدارة العامة للإذاعة والتلفزة ورئاسة الجمهورية فإن المنتج النهائي الواصل إلى بيوت كل التونسيين عبر

صدام حسين

الشاشة أثبت القدرة المهنية المبهرة التي استجاب بها الصحفيون للتحدي الكبير، لم يكن ثمة انترنت أو قنوات فضائية بالحجم المتاح حاليا، ومن الصعب على صحفي اليوم أن يتخيل نفسه في مواجهة حدث عالمي كبير كهذا أعزل بلا أدوات، فقط كانت لدى العاملين بمختلف المحطات برقيات متهاطلة على أجهزة التلكس في غرف الأخبار وأجهزة راديو عملاقة لالتقاط قنوات الشرق والإذاعات البعيدة وحافظة الحبيب اللمسي موزع الهاتف الشهير، أضف إلى ذلك صعوبة تحديد طبيعة الخطاب الإعلامي الرسمي المطلوب وكيفية ترجمة المسافة الفاصلة بين القرار السياسي واتجاهات الرأي العام بدقة، فعلى الصعيد السياسي تحفظت تونس في الجامعة العربية على التحرك العسكري الدولي ضدّ دولة عربية عضو في الجامعة مع إعلان رفضها غزو العراق دولةَ الكويت، وجماهيريا كان الشارعُ منحازا كلّيا إلى العراق وكانت صور صدام حسين تملأ الشّوارع والسّاحات في المظاهرات الحاشدة ضدّ العدوان، وكان على الإعلام أن يُعبّر عن الموقف الرسمي دون أن ينجرف وراء العاطفة الشعبية.

(مواصلة القراءة…)

السبسي سيدي خويا زوز أنواع، نوع ينفع ونوع يضرّ نوع يهز لقدام ونوع يجبد لتالي كيف الموجة ويا ويحو اللي يتحصر بين موجتين.

الباجي قايد السبسي وابنه

النوع الأول الباجي قايد السبسي اللي جبد اوراقو الكل بش يساند يوسف الشاهد وياقفلو، لقاءاتو في نيويورك مع المسؤولين الكبار تدلّ على أنو يعمل في دعاية خاصة لو كان عمل شطرها للحبيب الصيد ربما ما كناش نوصلو لهنا، اما اش تعمل، إذا حبوك ارتاح، ومحسوب يوسف ولدنا. المهمة واضحة، السّبسي يحبّ يرجع المستثمرين لتونس بعد ما وقفت الزنقة للهارب وما عادش عندنا وين نْقبّلو من جرّة السّلف، ولّينا بين الدول كيف هاك اللّي  كل يوم في المرشي يطلب في الركوب بش يروح لبلادو، والاّ يدور بورقة متع دواء ما لقاهش في السبيطار. وهنا يلزم الكاريزما متع السّبسي اللي الزعماء الكبار الكل يستقبلوه بالبوس واللّي هو تقريبا الرئيس الوحيد في العالم اللي وشوشلو أوباما في وذنو أول ما شافو هاك العام وحتى حدّ ما يعرف اش قال لو!

النوع الثاني حافظ قايد السبسي ولد مولى الباتيندة، يحب يعطي حزب النداء ليوسف الشاهد ويرجعنا لخرافة الحزب والدولة اللي في بالنا مشات على روحها. من غير حتى سبب ومن غير مقدمات، رجعت حكاية النداء اللّي حدّ ما عاد عندو وسع البال بش يحاول يفهمها والا يتبّعها، ناجي جلول في الاجتماع قال بعظمة لسانو الحزب هذا ولّى يمثل كلّ الأشياء اللي عدّيت عمري انّاضل ضدها، أكثرش من هكة؟!، والسيّد ضحكولو تمدّ على طولو، وموش عجب بعد غدوتين يرجّعلنا الشّعب المهنية!
اللي يبني فيه السبسي في نيويورك يطيّح فيه السّبسي في البحيرة، يوسف الشاهد يدْ هنا وساق غادي واحنا هانا واقفين لتونس!