امبراطور اليابان أكيهيتو

الامبراطور الياباني أكيهيتو رقد قام عمل تصريح تلفزي قال فيه اللي هو خايف تمنعو شيخوختو من القيام بمهام الامبراطور!

الراجل عمرو اثنين  وثمانين سنة فقط يعني مازال في مقتبل العمر، والامبراطور في الدستور الياباني هو رمز الدولة ووحدة الشعب  بينما الحاكم الفعلي هو رئيس الوزراء  يعني الامبراطور كيف الزير المتكي لا يضحّك لا يبكّي، وهذاك علاه طلع يتكلّم وهو قاعد قدام طاولة فارغة تقول في مركز أمن يبحث، ويلمّح اللّي هو يحب يخلّي لبلاصة لغيرو.
اينعم، امبراطور يلمّح تلميح وما ينجّمش يهبّط دمعتين ويقول: “خوذو المناصب والمكاسب بس خلّولي الوطن”! ما ينجّمش على خاطرو امبراطور موش دكتاتور، حسب الدّستور ممنوع عليه يغيّر أيّ شيْ في سياسة البْلاد.
يقول القايل: يتراجع الدستور!  لا سيدي خويا هنا تغلط، دستور اليابان موش كيف دستور البانان، ما تنجّمش تغيّرو لأنّو يسمّيوه “دستور السّلام”، الناس هاذم متليّعين م الحرب اللي دفْعو سومْها غالي، وفي خمسين سنة تجاوزو آثار القنابل الذرية وبناو حضارة جديدة، وهرْبو بينا سنينْ لقدّام.

هاو نْدخّلو حديث في حديث، هاك العام واحد م البايات مْشى لباريس وضيّفو المَلك في التّياترو ورّاه كيفاش النّاس تنتقد فيه وهو يصفّق ويضحك، وتلفّت للباي وقالو يلزمنا نْسايْسو الرّعيّة، تْلَفّت الباي للسيّد اللي بْجنبو وقالوا في ما معناه: “الجماعة هرْبو بينا”.

وحديثْنا قِياس، هرْبو بينا، واحْنا من عهد البايْ باهْتين فيهُم، العمْلة اللّي عْملها امبراطور اليابان ما تليقش بينَا، احْنا اللّي في ثقافِتنا نِعتقْدو اللي البِلّ تِمشي على كْبارها لكن ما نِنْتبهوش اللّي هي ماشِية للهاوية.