لوحة للفنان عز الدين البراري

شوف هاك العصفور عيش ولدي، الجملة هذي هي اللي يستعملها الطهار قبل بش يلهِّي الصغير اللي بين ايديه ويهبط عليه بهاك الجلم ويقولو العرب رحلت. ومن حينك تتكسر قلة الفاكية في الوطا ويترماو فوقها الزغار والزغاريط يعطي مسد، وهاك المطهر أربعة م الناس شادينو من ساقيه عرقو شرتلة ويعيط لين يفحم في وسط هاك الزازة. من بعد يرميوه وسط النساء على جلد علوش جديد مخبي م العيد، وتبدا خالتو تْمروَح عليه وأمو تقبض في الرشوق.

صُغرنا الكل عدّيناه خايفين م الغول والطهّار، كيما يقول لطفي بوشناق في غنايتو، مللّي يطلّ في راس الزنقة بالطبلية البيضاء والفاليجة الجلد تسمع كان فر فر وكل واحد يِترمى في دارهم.

الطهّار هو أول الناس اللي كذبو علينا واحنا صغار، وقتللي يقولك شوف عيش ولدي هاك العصفور تصدقو وتسرح بعينيك معاه وتسهلو مهمتو من غير ما تشعر وما يجيش لبالك اللي المقص بش يضرب ضربتو

كي تجي تشوف واستنادا لنظريات علم النفس الحديث عندنا الحق نخافو م الطهار، الضربة موجعة ومن غير بنج ومفاجأة لأنه في أغلب الحالات تلقا الصغير ماهوش فاهم كوعو من بوعو لا عارف علاه حنّاولو، لا علاه لبسوه جبة، لا علاه ركبوه فوق حصان، يعيش سبعة أيام وسبعة ليالي كيف السلطان ومن بعد ما يفيق كان بالمقص هبط عليه والناس الكل تضحك شايخة.

(مواصلة القراءة…)

هل أتاك حديث البوكيمون جو؟ اللعبة اللي حرمها مفتي الديار التونسية، أي نعم في دولة مدنية المفتي يصدر فتوى لتحريم لعبة الكترونية.

اللعبة هذي خرجت بداية شهر جويلية في بعض دول العالم وفي أقل من أسبوعين وصلت لمليارات الأشخاص ، تجاوزت في فترة قصيرة جدا النجاح اللي حققتو مواقع كيف تويتر وفايسبوك في عشرة سنين. وولات ظاهرة عالمية، هي لعبة تتلعب باستخدام الهواتف الذكية وتنتمي إلى ما يعبر عنه الواقع المعزز، وهذي تفسيرها ساهل، اللعب الأخرى تتلعب مائة بالمائة في عالم افتراضي متخيل لا وجود له في الواقع أما اللعبة هذي فأول ما تستخدمها تأخذ موقعك وتشغل الكاميرا متع تاليفونك وتخليك تتحرك في الواقع متاعك متع كل يوم وتبحث ع البوكيمونات الكائنات الخيالية اللي ما هي موجودة الا في تاليفونك لكن تراها انت ع الشاشة
إلى هذا الحد يبدو الأمر طبيعي لأن كل لعبة من ألعاب الفيديو عندها مخاطرها. اللي ماهوش طبيعي أنو مفتي الديار التونسية يصدر فتوى بتحريم اللعبة هذي ماهوش طبيعي لأن فعل التحريم في دولة مدنية هو سابقة خطيرة، والأسباب اللي قدمها المفتي فضفاضة من السهل أنك تلبسها لأي شيء آخر وتحرمو…(للاستماع إلى الفقرة كاملة)

الغنوشي أردوغان

محاولة انقلاب عسكري فاشلة في تركيا تابعها الجمهور في تونس بعقلية الفيراج، ناس مع أردوغان وناس ضدو ، وهذي هي النتيجة المنطقية لقسمة المجتمع إلى طائفتين: علمانيين وإخوان.

الجو اللي دار في الفايسبوك ليلة الانقلاب الفاشل يشبه لهاك الأجواء متع أفلام فريد شوقي وقت اللي يدخل الباندي القهوة ويجبد صاحبو بش يعطيه بونيات فإذا بيها الناس الكل اللي في القهوة يدوروا يضربوا في بعضهم بالكراسي والشقوفات

اخطانا من أفلام السينما المصرية وهات نشوفو فيلم الأخ أردوغان ونحاولو نجاوبو على السؤال التالي ياخي احنا اش مدخلنا؟

أولا الاهتمام بالسياسة الدولية ظاهرة صحية في المطلق، لكن اللي ماهوش عادي هو الانقسام الحاد بين متعصبين لأردوغان ومتعصبين ضدو، لأنو في النهاية وأيا كانت النتيجة اللي بش يبقى هو التعصب.
ثانيا، اللي صار في ها المناسبة يشبه لحكاية السيد اللي عمل ترميمات لدارو وزيّنها و مع أول مطرة تعرى الدهن وتشققت الحيوط من جديد واكتشف اللي المقاول غشو (استمع إلى الفقرة كاملة)

الحبيب الصيد رئيس الحكومة

الباب الصغير والباب الكبير، قالوا الحبيب الصيد يرفض الخروج من الباب الصغير في محاولة لتفسير عدم تجاوبو مع المبادرة الرئاسية بالطريقة المطلوبة اللي هي تقديم الاستقالة
والبقاء في حالة تصريف أعمال. عبارة كيفما هذي تنطلق من أحكام جاهزة تخليي الناس تعتقد اللي الاستقالة هي الخروج من الباب الصغير يعني الخروج  اللي فيه حطّ من مكانة الشخص المعنوية بينما الخروج عبر بوابة البرلمان ووضع عمل الحكومة أمام ثقة النواب هو الخروج الكبير…

بعض العناوين الصحفية كيف ها العنوان هذا تغلّط برشة خصوصا لما تعطي انطباع اللي هي حقيقة مطلقة موش وجهة نظر نسبية ، الوضع اللي احنا فيه يقول اللي استقالة رئيس الحكومة هي الخروج من الباب الكبير ويا ريت تكون من غير أي وقوف أمام البرلمان، لأن سياق الأحداث أبعد ما يكون عن الدستور ومجلس نواب الشعب ينفذ في مبادرة سياسية مسقطة عليه وماهيش نابعة منو، اش يفيد وقوف الحبيب الصيد أمام نواب ينفذوا في أجندة أحزابهم اللي قررت تغييرو؟ واش يفيد تمسكوا هو وحدو بتطبيق الدستور وقت اللي النخبة السياسية بكلها تقريبا ماهيش متقلقة من عدم احترام الدستور؟