حكومة الوحدة الوطنية

حكومة الوحدة الوطنية، على كل لون يا كريمة، قاروص، وراطة، تريلية حجر، سردينة، صبارص، وزف، شركاو،  الكل تلمّو في مرقة وحدة، الدستوري والإسلامي واليساري والقومي والنقابي، زعيط ومعيط، الحاصل حكومة وحدة وطنية بالفم والملا.

ومن غير ما اتعب روحك في السؤال على علاقة سمير بالطيب بالفلاحة والا عماد الحمامي بالتشغيل، لأنها حكومة سياسية وما قال حدّ اللي هي حكومة تكنوقراط، كيف كيف ما تسألش ع البرامج والدوسيات، لأن ميثاق قرطاج سبق الحكومة وفرشلها الثنية، وفي أربعة كلمات قصار حدد يوسف الشاهد بعض استراتيجيات حكومتو بعد ما سمى الفريق اللي اختارو، وركز أكثر على اقتصاد الانترنت والمبادرة الحرة، حاجة صعيب ياسر يفهمها اللي مازال يخزر للشغل على أنو مسمار في حيط رغم اللي الحيط طاح من هاك العام.

توة يقول القايل، حكومة تلمت فيها الناس الكل، كيف الي ربح في الانتخابات كيف اللي خسر، اشكون اللي يسب فيها ويخرج في أعوارها بجهد جهدو؟ الجماعة مازالو كيف طفّاو الضوء في دار الضيافة وركبوا كراهبهم وندهوا، والكتائب ندهت، هذا بيه هذا عليه هذا صفتو هذا نعتو، الحصيرة تفرشت والريحة طلعت تقول هاك الحوسة متع الذبيحة في العيد الكبير واحد ينفخ وواحد يسلخ وواحد يشعل في الكانون، وواحد يمروح. ماكينة جبارة متع ضرب تحت الحزام لا يفيد فيها لا بوس خوك، لا تو تكبر وتنسى، لا السوق الجاي تاخو بايك، لا شي، اضرب مازال يتنفس، حرب تشعل واللي تجي فيه ضربة خاطيه ربي يصبرو، حرب أهلية الكترونية في بلاد مازالت كيف عملت حكومة وحدة وطنية، برة افهم عاد!
وانت سيدي خويا اللي موش عاجبك الوضع، موش غنيتلنا محلا القعدة ع المية ومحلا الربيع محلا الثورة التونسية تضمّ الجميع؟ أي هاي ضمتهم!

يبيعوا القرد ويضحكوا على شاريه

في الزيارة اللي قام بيها يوسف الشاهد بصيفتو وزير الشؤون المحلية لولاية منوبة، استقبلوه بطريقة تذكرنا في الاستقبالات اللي كانت توقع قبل. صفّ مسؤولين يسلمو عليه و العلوش ممدود في الكياس والجزار يتلفت للوزير ويقلو، القبلة من هنا ماو؟، ومن بعد يهبط على العلوش بالسكينة ويسيّل الدم، صحيح ما نكذبوش ماكانش ثمة لا بخور لا زغاريط، وهذي يظهرلي نساوها الجماعة على خاطر كل شيء كان موجود، باكوات النوار والصغيرات المتزينين الله أعلم من وقتاش واقفين تحت الحيط يستناو. وقبل ما يدخل الوزير وقفوا قدامو وصوتهم لايث م السخانة والتعب، ماهم فاهمين شيء طلعو بغناية تحكي ع الحرب اللبنانية الأهلية متع هاك العام ومن جملة ما تقول، يا عالم ارضي محروقة  ارضي حرية مسروقة  اعطونا الطفولة اعطونا الطفولة اعطونا الســـــــلام.

خلينا نوضحو بعض حاجات، الحادثة هذي وقعت في ماي وأكيد الشخص اللي نظم ها الاستقبال الكاريكاتوري الحاسة السادسة، حاسّة الطمع، كانت اتدغدغ فيه وتقل لو اللي يوسف الشاهد عندو مستقبل كبير في البلاد. لكن المثل يقول إذا المهبول ياكل ويبة العاقل ما يعطيهالوش، ولذا الوزير كان ينجم يرفض ها المظاهر، يرفضها لأنها صورة من صور التزلف فيها برشة نفاق ووصولية وتخلف، صورة تضرّوا هو أولا، الناس مازالت تتذكر لتوة عماد الطرابلسي داخل لبلدية حلق الواد بعد ما ولى رئيسها وكيفاش حطولو ثلاثة كعبات قاروس فحّج فوقهم والبخور عامل عجعاجي، المظاهر هذي بالذات كرهوها التوانسة لأنها كرهتهم في السياسة، وكرهتهم في رواحهم، وكانوا يعتقدوا أنها ماعادش تتعاود لكن خاب الأمل.

نحكي على جزء م التوانسة  الباقين اسأل على صاحبك استغناش أما الطبيعة هي هي هوما يبيعو القرد ويضحكو على شاريه.

يوسف الشاهد

البلاد سوق ودلال من وقت اللي تمّ تكليف يوسف الشاهد بتكوين حكومة جديدة، البعض يقول ميركاتو، ويشبه تنقلات الوزرة بين المناصب بتنقلات اللاعبين المحترفين بين الفرق/ لكن أنا نرى اللي هو كيف سوق الجمعة ، سوق الفريب!
الدستور يعطي لأي رئيس حكومة جديد مهلة شهر حتى يقدم أعضاء حكومتو ويعرض برنامجو أمام البرلمان للحصول على ثقة النواب، وهاك الشهر هذاك هو اللي يخرج فيه التونسي القرينتة اللي فيه، تقول بالة متع فريب تحلّت:
قبل ما يدخل الشاهد لدار الضيافة في قرطاج ويبدا مشاوراتو خرجت قائمة الحكومة الجديدة وبدات تدور ع الفايسبوك، وبالطبيعة المشكلة ما هياش في اللي كتب القايمة بل في الناس اللي صدقتها وبدات تنشر فيها وكأنها حقيقة، إذن نلقاو في البالة برشة غباء وسذاجة وأمية سياسية.

(مواصلة القراءة…)

لوحة للفنان عز الدين البراري

شوف هاك العصفور عيش ولدي، الجملة هذي هي اللي يستعملها الطهار قبل بش يلهِّي الصغير اللي بين ايديه ويهبط عليه بهاك الجلم ويقولو العرب رحلت. ومن حينك تتكسر قلة الفاكية في الوطا ويترماو فوقها الزغار والزغاريط يعطي مسد، وهاك المطهر أربعة م الناس شادينو من ساقيه عرقو شرتلة ويعيط لين يفحم في وسط هاك الزازة. من بعد يرميوه وسط النساء على جلد علوش جديد مخبي م العيد، وتبدا خالتو تْمروَح عليه وأمو تقبض في الرشوق.

صُغرنا الكل عدّيناه خايفين م الغول والطهّار، كيما يقول لطفي بوشناق في غنايتو، مللّي يطلّ في راس الزنقة بالطبلية البيضاء والفاليجة الجلد تسمع كان فر فر وكل واحد يِترمى في دارهم.

الطهّار هو أول الناس اللي كذبو علينا واحنا صغار، وقتللي يقولك شوف عيش ولدي هاك العصفور تصدقو وتسرح بعينيك معاه وتسهلو مهمتو من غير ما تشعر وما يجيش لبالك اللي المقص بش يضرب ضربتو

كي تجي تشوف واستنادا لنظريات علم النفس الحديث عندنا الحق نخافو م الطهار، الضربة موجعة ومن غير بنج ومفاجأة لأنه في أغلب الحالات تلقا الصغير ماهوش فاهم كوعو من بوعو لا عارف علاه حنّاولو، لا علاه لبسوه جبة، لا علاه ركبوه فوق حصان، يعيش سبعة أيام وسبعة ليالي كيف السلطان ومن بعد ما يفيق كان بالمقص هبط عليه والناس الكل تضحك شايخة.

(مواصلة القراءة…)