المطر صبّت، والقمم فاضت، الشوارع تِمْلات، والكراهب غرقت، الديار في الحوم الواطية تعبّات بالماء، وها اللي هبط يعفّس ويرفّس في الميلوسي ويلعن في الطاسيلة والفاصيلة وهاك الصغير كرتابلتو على ظهرو، رماتو الموجة وما لحقو عليه كان بعد عشرين ميترو سباحة حرة،  سوسة قابادجي، باب الجديد، باب بحر، ترويكاديرو، سيدي بوجعفر، المستير العقبة، صقانس، الغدير. وللا بية خارجة م الحمام سخونة تفور صحا صحا.

هذي غسّالة النوادر كيف العادة والعوايد، ربي يعطي خيرو ، والأرض تطرشق بالضحك على الناس اللي غرقت في الكذب والنفاق والميزيريا.

مطرة سبتمبر معروفة تعمل هذا وأكثر، ما تبدلت كان لغة الناس والتلافز، قبل مايحدثوك كان ع المساعدات اللي بعثها سيادتو للمناطق المنكوبة وعلى بطانيات التضامن الاجتماعي، الناس الكل تفرش بش تلقى ما تتغطى، العزوزة هازها الواد وهي تضحك قدام الكامرا متع اخبار الثمنية وتقول العام صابة والمواطن الزوالي اللي حاير في شريان خبزة وموش عارف كيفاش بروح لدارو ياقف قدام العلم المعلق فوق حانوت الشعبة ويحكيلك ع الثلج كيفاه يغذي المائدة المائية العميقة ومرتو بحذاه تزغرط.

الناس الكل تحكي ع البنية التحتية المضعضعة في البلاد ولا واحد تحدث على البنية الفوقية المهسهسة بنية العقل والكمباص. بنية المخ والتفكير

الحكاية ساهلة اما الناس تتكلم بالصعيب، قنوات التطهير قديمة وضويقة وما نظفوهاش اما حتى الزبلة ودبابز البلاستيك اللي تجرها المطر ما عندك فيها ماتقول،  وفي حالة الكوارث الطبيعية ماذا بيه الواحد يشمر على ذراعو ويسيب صالح شوية، لكن احنا الكل ولينا خبراء في البنية التحتية، و تخطيط المدن والنمو الديمغرافي والمواصفات العالمية ، على خاطر احنا نظاف وباهين واللي حكمونا الكل من عهد لمين بي سراق وخايبين. يعجبكشي؟

السبسي سيدي خويا زوز أنواع، نوع ينفع ونوع يضرّ نوع يهز لقدام ونوع يجبد لتالي كيف الموجة ويا ويحو اللي يتحصر بين موجتين.

الباجي قايد السبسي وابنه

النوع الأول الباجي قايد السبسي اللي جبد اوراقو الكل بش يساند يوسف الشاهد وياقفلو، لقاءاتو في نيويورك مع المسؤولين الكبار تدلّ على أنو يعمل في دعاية خاصة لو كان عمل شطرها للحبيب الصيد ربما ما كناش نوصلو لهنا، اما اش تعمل، إذا حبوك ارتاح، ومحسوب يوسف ولدنا. المهمة واضحة، السّبسي يحبّ يرجع المستثمرين لتونس بعد ما وقفت الزنقة للهارب وما عادش عندنا وين نْقبّلو من جرّة السّلف، ولّينا بين الدول كيف هاك اللّي  كل يوم في المرشي يطلب في الركوب بش يروح لبلادو، والاّ يدور بورقة متع دواء ما لقاهش في السبيطار. وهنا يلزم الكاريزما متع السّبسي اللي الزعماء الكبار الكل يستقبلوه بالبوس واللّي هو تقريبا الرئيس الوحيد في العالم اللي وشوشلو أوباما في وذنو أول ما شافو هاك العام وحتى حدّ ما يعرف اش قال لو!

النوع الثاني حافظ قايد السبسي ولد مولى الباتيندة، يحب يعطي حزب النداء ليوسف الشاهد ويرجعنا لخرافة الحزب والدولة اللي في بالنا مشات على روحها. من غير حتى سبب ومن غير مقدمات، رجعت حكاية النداء اللّي حدّ ما عاد عندو وسع البال بش يحاول يفهمها والا يتبّعها، ناجي جلول في الاجتماع قال بعظمة لسانو الحزب هذا ولّى يمثل كلّ الأشياء اللي عدّيت عمري انّاضل ضدها، أكثرش من هكة؟!، والسيّد ضحكولو تمدّ على طولو، وموش عجب بعد غدوتين يرجّعلنا الشّعب المهنية!
اللي يبني فيه السبسي في نيويورك يطيّح فيه السّبسي في البحيرة، يوسف الشاهد يدْ هنا وساق غادي واحنا هانا واقفين لتونس!

بورقيبة والسبسي

ثلاثة حوادث وقعت في وقت متقارب ما عندهاش في رأيي حتى علاقة بالسياسة وما تنجم تدخل كان في باب التبوريب، حاجة تتسمى دكتاتورية الزواولة.
والي القصرين هدّوا عليه للدار واضطر يهرب عايلتو لتونس، أمالي عساس الوتيل في جربة وقفوا كيران شركة فسفاط ڤفصة والمعمل الكيمياوي بالمظيلة احتجاجا على توقيف ولدهم في القضية اللي في بالكم بيها، والناس اللي حرقت في بن قردان ماكينات الشركة التي تكيس في الكياس، لأنو واحد م المهربين تقتل في مواجهة مع الجيش وقعت في منطقة عسكرية مغلقة.
السياسيين اللي علّقوا على ها الحوادث اختصاصيين في تطليع الماء للصعدة، يعتبروها نتيجة منطقية لغياب التنمية، ومجرد تذكير لرئيس الحكومة بالتزامات الدولة مع الجهات المحرومة. الناس هاذم عندهم قدرة عجيبة على تبرير جرائم الحق العام، والمجرم عندهم ديما زوالي يعاني م الحُقرة والتهميش. بورقيبة في بداية السّتينات عمل حملة قوية على التجار اللي رفعوا الأسعار وعملوا الاحتكار وبعض الزواولة اللي يبيعوا في الفجل والمعدنوس والعظم في رمضان بأسوام أغلى من الأسوام اللي حددتها الحكومة لقاو رواحهم في بوفردة بعض الأحكام بالسجن وصلت خمس سنين والناس قعدوا باهتين. بورقيبة ماكانش م العاكسين وعمل خطاب فسّر فيه اللي مقاومة التخلّف تبدا بالانضباط واللي الناس هاذم كيف يخالفوا قرارات الدولة يضروها.
(الرئيس ما يوخرش وما تاخذوش الرحمة على الأشخاص وقت اللي في الميزان نجاح أو فشل معركة شعب بتمامه وكماله)
ثمة فرق كبير بين المجرم والزوالي كل حاجة في بقعتها لأنو ثمة مجرمين من أغنى الأغنياء وثمة زواولية وطنيين وشرفاء،

يرحمك يا بورقيبة النار تخلف الرماد!

للاستماع إلى جزء من الخطاب

نعمان الفهري وزير تكنولوجيات الاتصال والاقتصاد الرقمي سابقا

نعمان الفهري وزير تكنولوجيات الاتصال في حكومة الحبيب الصيد نشر فيديو على صفحتو في الفايسبوك  يلخص حصيلة ثمانطاش شهر عداهم في الوزارة وشكر من شكر من اللي خدموا معاه سواء المتطوعين والا الشهارة ويقول تعليقا على ها الفيديو: تونس مازالت محتاجة لبرشة خدمة و برشا تضحيات باش تدخل للقرن 21!

أَبَيْ ! احنا في بالنا دخلنا القرن الواحد والعشرين توة عندنا سنين، وبالأمارة هاك العام كانت عندنا قناة 21 وصندوق 21 21 وأجندا 21 وهات من هاك الدعايات.
حكومة الحبيب الصيد صارلها كيف التيتانيك وكل واحد مللي كانوا راكبين فوق ظهرها يلوج على ثنية يهرب منها، سي نعمان موش الوزير الوحيد اللي  حب يعلق على تجربتو في الوزارة وهو خارج ثمة شكون عمل تصويرة وهو يستنى في تاكسي وثمة شكون كتب مقال، لكن كلام سي نعمان ما فيه شيء جديد، النتيجة اللي وصللها  يعرفها أي واحد مغروم بالتنبير وما تحتاجش ثمنطاش شهر في جبة وزير، يكفي تشوف هاك الصف اللي يحشم في البلدية لاستخراج مضامين الحالة المدنية، والريزو اللي يمشي ويطيح تقولش صغير يحبو يتعلم في المشي،  سي نعمان تنجم تعمل دورة نهار أحد عشية على ماكينات الفلوس خصوصا في المناطق السياحية وايجا حاسبني، والا تعرفش كيفاش لواه نبعدو لبعيد تي برة لمكتب البريد واعمل روحك بش تبعث ماندة والا برقية.

حكاية اللي احنا ماناش في القرن واحد وعشرين من تحصيل الحاصل وما يقل لك العكس كان المغفّل والا السياسي الكذاب والا الجاهل، نعرفو رواحنا ماشيين بالتوالي ومظاهر التخلف هي الحاجة الوحيدة اللي قاعدة تتطور. الناس تعمل في مارشاريار وأنت تحكيلهم على برشة خدمة وبرشة تضحيات توة هكة سي نعمان؟

الوحدة الوطنية

العودة السياسية على وزن العودة المدرسية، وقتها معلوم نعرفوه بالأمارة موش باليوم، حاجة كيف قوايل الرمان تتعرف بالسخانة والذبان، يبدا العرق يجبد عليك والوشواشة تغنيلك في وذنيك وغمضة النوم ما تراهاش. اشنية الأمارة؟

مع العودة السياسية يسكت مهرجان قرطاج ويتكلّم جبل سمّامة، سعد المْجرّد  يهز زادوا وزوادوا ويروّح لبلادو يخليها واسعة وعريضة لخبراء التلفزة في البرامج الحوارية، العائلة تحضر المحفظة والطبلية والنقابات تهدد بمقاطعة العودة المدرسية، في الجنوب تشعل الاحتجاجات وياقف الفسفاط وتتحرق العجالي في الكياسات، يدور الدولاب وتتحرك الأسباب ويشيخو جماعة الأخبار كي يكثر الهمّ والدمار، ملاّ جو.

(مواصلة القراءة…)

الحكومة التونسية

البرامج الحكومية كيف البرنامج المدرسي، برنامج واحد تقراه الناس الكل في المدارس الكل كيف كيف م الشمال للجنوب وم المدينة للريف: هذا أبي مبروك، هذه أختي دليلة.
برنامج تكتبو الوزارة، المعلمين يقريوه والمتفقدين يتفقدوه. وطريقة توصيل البرنامج للتلامذة تختلف من معلّم إلى آخر، كيف الزريقة هي نفسها من فرلملي لفرملي ومن طبيب لطبيب مرة توجع ومرة ما تحسّش بيها.
وفي المشاوراتْ اللّي تعملت لْتكوينْ حُكُومِةْ وِحْدة وطنية كْثر حديث المعارضة ع البرامج، البعض حب يبدل الموضوع وينقص م التركيز ع الأشخاص والأحزاب ويحكي على الخطط والأفكار، خاصة في المالية والتنمية والتشغيل والاستثمار، وين نلقاو العقدة واحلة عندها قرابة العشرة سنين في المنشار، وكأنّ الوزير بمجرد تكليفو بش يخرّج برنامج من جيبو ويدخل بيه ع الوزارة، هذي تنفع هذي تضر هذي تنفع هذي تضر حتى لين يخليها مدينة فاضلة ويمشّي الناس على الصراط المستقيم.
نحب نسأل، بالله قداش شفتو من برنامج من وقت اللي قامت الثورة؟ تي ما هو برنامج واحد، كل حكومة تجي تخرجلنا نفس البرنامج تقول طبعة جديدة لكتاب القراءة. الغلاف مرة مدهون بالأزرق ومرة مدهون بالأحمر، مرة مزين بتصويرة حمامة ومرة بتصويرة نخلة، مرة بالبرنوس ومرة بالكسوة، أما كيف تحلّ الكتاب بش تلقى هذا أبي مبروك، هذه أختي دليلة، نفس الدّرس يتعاود مع كل الحكومات سواء اللي جات أو اللي مشات برنامج نحفظو فيه توة سنين طويلة تعدات حتى لين فدينا
برنامج مطابق للمواصفات العالمية الجديدة حوت ياكل حوت وقليل الجهد يموت، كتاب مدرسي مستورد، كتبو صندوق النقد الدولي للدول الغارقة في الديون بش تبقى واقفة على ساقيها قبل ما يفوت الفوت، آش يقول الميت قدام غاسلو؟

حكومة الوحدة الوطنية

حكومة الوحدة الوطنية، على كل لون يا كريمة، قاروص، وراطة، تريلية حجر، سردينة، صبارص، وزف، شركاو،  الكل تلمّو في مرقة وحدة، الدستوري والإسلامي واليساري والقومي والنقابي، زعيط ومعيط، الحاصل حكومة وحدة وطنية بالفم والملا.

ومن غير ما اتعب روحك في السؤال على علاقة سمير بالطيب بالفلاحة والا عماد الحمامي بالتشغيل، لأنها حكومة سياسية وما قال حدّ اللي هي حكومة تكنوقراط، كيف كيف ما تسألش ع البرامج والدوسيات، لأن ميثاق قرطاج سبق الحكومة وفرشلها الثنية، وفي أربعة كلمات قصار حدد يوسف الشاهد بعض استراتيجيات حكومتو بعد ما سمى الفريق اللي اختارو، وركز أكثر على اقتصاد الانترنت والمبادرة الحرة، حاجة صعيب ياسر يفهمها اللي مازال يخزر للشغل على أنو مسمار في حيط رغم اللي الحيط طاح من هاك العام.

توة يقول القايل، حكومة تلمت فيها الناس الكل، كيف الي ربح في الانتخابات كيف اللي خسر، اشكون اللي يسب فيها ويخرج في أعوارها بجهد جهدو؟ الجماعة مازالو كيف طفّاو الضوء في دار الضيافة وركبوا كراهبهم وندهوا، والكتائب ندهت، هذا بيه هذا عليه هذا صفتو هذا نعتو، الحصيرة تفرشت والريحة طلعت تقول هاك الحوسة متع الذبيحة في العيد الكبير واحد ينفخ وواحد يسلخ وواحد يشعل في الكانون، وواحد يمروح. ماكينة جبارة متع ضرب تحت الحزام لا يفيد فيها لا بوس خوك، لا تو تكبر وتنسى، لا السوق الجاي تاخو بايك، لا شي، اضرب مازال يتنفس، حرب تشعل واللي تجي فيه ضربة خاطيه ربي يصبرو، حرب أهلية الكترونية في بلاد مازالت كيف عملت حكومة وحدة وطنية، برة افهم عاد!
وانت سيدي خويا اللي موش عاجبك الوضع، موش غنيتلنا محلا القعدة ع المية ومحلا الربيع محلا الثورة التونسية تضمّ الجميع؟ أي هاي ضمتهم!

المصطلحات الجديدة كثرت علينا، بعد ما عدينا أعمارنا الكل ما نعرفو م السياسة كان: دُعي إلى مهام أخرى.
م الترويكا للحكومة الرباعية، ومن حكومة التكنوقراط للحكومة السياسية، ومن حكومة المحاصصة الحزبية لحكومة الوحدة الوطنية. هذي هي العناوين الكبرى ومعاها شوية صرف من نوع العدالة الانتقالية والتوافق والحوار الوطني والدعوي والسياسي والهدنة الاجتماعية.

مصطلحات جديدة بدينا نتعلمو فيها من وقت اللي كنا سنة أولى ديمقراطية، شرينا الكرارس والأقلام وبدينا نتعلمو م البلاتوهات التلفزية دريس عند القصّاص ودريّس عند المهدي بن غربية، وحدة وحدة بدينا نحلو في عينينا على علم جديد كنا محرومين منو،  والعلم هذا في الحقيقة موش صعيب أما لازمو شوية تخديم مخ. ها المصطلحات  تتعود بيها وتحفظها وتعرف كيفاش تستعملها وتدخلها في حديثك بمناسبة ومن غير مناسبة، وهكا تولي خبير في التنمية المحلية ومكافحة الإرهاب، حاجة تشبه لهاك اللي يداوي السحر والعذر والشقيقة و يجيب القبول ويطرد التابعة ويفك المربوط.

قال لك حكومة الوحدة الوطنية موش حكومة محاصصة حزبية لكنها حكومة سياسية موش حكومة تكنوقراط. ما نحبوش المحاصصة الحزبية اما يلزم نحترمو نتائج الانتخابات، حزب النداء قال رئيس الحكومة حر في اختيار وزراؤ ويعمل هكة يهبط عليه بخمسة وخمسين دوسيه

النهضة قالت احنا نحترمو نتائج الانتخابات اللي هي بالطبيعة ماعادش موجودة في الواقع، ولذا  كان خذيتو عشرة بقايع اعطيونا تسعة وكان خذيتو خمسة اعطيونا أربعة. يعني هي والنداء كيف حسن وحسين متع مسرحية الماريشال عمار. والتلفزة كل ليلة تبدا بنفس التصويرة ثلاثة والا أربعة مكستمين يهرولوا داخلين لدار الضيافة ومن بعد تشوفهم خارجين وفي وسطهم رئيس الحكومة الجديد يلقي كلمة تقريبا هي نفسها تتعاود كل يوم.
شهر من زمان وتطلع الحكومة الجديدة، الحاج موسى يشد بلاصة موسى الحاج وموسى الحاج يدعى إلى مهام أخرى.