كلمة وقص

الحكومة عاونها بالسكات

الحرب على الفساد

صورة من موقع المسلة

المسافة بين مساندة الحكومة في محاربة الفساد وهزّان القفة لرئيس الحكومة مسافة قصيرة ياسر، ويلزمك تعرف الثنية مليح ربما تبدا ماشي في الطريق الأول تلقى روحك تعديت من غير ما تشعر للطريق الثاني.

في الحقيقة انت كمواطن عادي وبسيط ما عندكش خلفيات وتمشي الحيط الحيط، تتكلم من منطلق حماس ورغبة في أنو الفيلم ما يوفاش، وما عليكش ملام، في نهاية الأمر احنا المواطنين صنيعة ستين سنا كلام، ثقافة فخامتو وسيادتو، ديما ثمة شخص نصف إلاه، هو اللي يفكرلنا وهو اللي يعمللنا، هذاك علاه المساندة عندنا ما تكون كان بالتصفيق ونحبو ياسر الأفلام .

ثمة فئة أخرى، ما نعتقدش أنها عفوية وساذجة وترتكب في الأغلاط اللي يرتكبها المواطن العادي على حسن نية، استضافة محامي أحد الموقوفين من بلاتوة لبلاتو، موش حرية إعلام، لكن مساندة للفساد والفاسدين، في الحرب إذا ماكش معايا راك ضدي، القضايا تناقش في المحاكم والمحامين يرافعوا غادي موش في التلافز، واحد م الموقوفين، أشهرهم، يتعدا في ومضة  كاميرا كاشي كأي شخصية عامة لا غبار عليها. وهذا الكل تشويش في الحرب على الفساد بش ما نقولش تحركات مريبة للطابور الخامس.

الحرب هذي كيف كل الحروب، ما تنجمش تكون قصيرة وخاطفة، إنما يلزمها نفس طويل وقدرة على المواصلة، كيف كل حرب يلزم فيها أبطال وضحايا، والكلنا معنيين بيها، الفساد في تونس ظاهرة اجتماعية وثقافية وأخلاقية قبل ما يكون معطى سياسي واقتصادي ويلزم نساهمو الناس الكل في دفعان الكلفة، حالة الحرب موش حالة عادية في حياة الشعوب. هذاك علاه: الحكومة عاونها بالسكات واخدم على روحك.

التعليقات على الحكومة عاونها بالسكات مغلقة more...

آش جاب تونس لبريطانيا؟

رئيس الجمهورية أثناء استقباله الهاشمي الحامدي

رئيس الجمهورية أثناء استقباله الهاشمي الحامدي

أثناء مناقشة قانون المخدرات وحوار السبسي مع نسمة الهاشمي الحامدي قال اش جاب تونس لبريطانيا؟، بالطبيعة الموضة الأيامات هذي اشكون يذمّ التوانسة أكثر أما رغم السخرية والاستعلاء اللي في كلامو باعتبارو مواطن بريطاني من أصول تونسية نعترف اللي عندو حق والحق ما يغشش حد، اش جابنا ليهم، كيف تدور بريطانيا الكل ما تلقاش واحد يعمل في السياسة كيف الحامدي، و تونس عمرها ما تعطي رخصة قناة تلفزية مولاها يعمل فيها كل شيء ما ناقص كان بش يتشتش بعد ما يوفى الارسال. المرزوقي خدمتو الوحيدة حاليا هي التصريحات التلفزية في المحطات الأجنبية، بين البرنامج والبرنامج يعمل برنامج وفي كل برنامج يعاود نفس الكلام، الانتخابات مغشوشة و بخروجو هو م القصر رجع النظام القديم وكأن الديمقراطية والحرية وحقوق الانسان أصول تجارية مقيدهم باسمو وموش ممكن يتوجدو في غيابو هو. السبسي إلى حد الآن كل ما يجبد ورقة من الشكبة متع الانتخابات يلقى روحو محدود الصلاحيات، عدى قانون المصالحة ما تعداش، وتوة قانون المخدرات مازال واقف في القرجومة والبلاد كأنها كوكوت، قريب تتكلاطى، والحزب اللي طلعو للرئاسة كي الكاس اللي تكسر ما عادش يتلم، ما نحكيوش عاد على هاك المرا اللي بكا عليها على خاطر ما كلاتش اللحم عندها ثلاثة شهور هذيك حتى الفلفل والطماطم نساتهم. السبسي المرزوقي الحامدي، اخزر لواحد تنسى الآخر، رب أنعمت فزد، ثروة وطنية حقيقية متع ضمار في بلاد هي الوحيدة في العالم اللي الحملة الانتخابية الرئاسية متاعها ما توفاش، هذا يتكلم وهذا يتكلم ولوكان جاء الكلام يتباع ويتشرى رانا أغنى بلاد، و قالوا تعرفش الديمقراطية قالو نزيد فيها.


 


حمام بن سدرين

راشد الغنوشي

راشد الغنوشي

قالها راشد الغنوشي ما قلناهاش احنا: حمام بن سدرين.
الشيخ شبه جلسات الاستماع العلنية اللي عملتها هيئة الحقيقة والكرامة، بحمام ومطهرة وكأنها البلاد بعد ما تسمع حكايات التعذيب في السجون والمعتقلات تعمل الطهارة الكبرى، لكن اللي يلاحظ الجو العام في الفايسبوك مثلا يرى اللي مباشرة بعد الجلسات هذي قامت حرب أهلية، النار شعلت، الأجواء تكهربت، والعباد تقسمت، جلادين وضحايا، وفك ايدي من شوشتك، الدوسيات القديمة الكل تجبدت، مع شوية سبّان وتهديد وكلام زايد، فسّخ وعاود من أول وجديد، كل ما تخدم في مجال ما يسمى بالتوافق والوحدة الوطنية طاح في الماء، الحكاية بدات من التصريح بالحكم في قضية الشهيد لطفي نقض، وزادت بعد ما بدات الجلسات،  وهذا يدل على أنو الرأي العام موش مهيأ لدخول الحمام، واللي الطياب اللي يطقطقلو في عظامو قريب يفتلو من بعضو ويخرجو يمشي بالتوالي.

حتى حد ما هو ضد العدالة الانتقالية، لكن الناس الكل ضد توظيفها سياسيا، قالها حمة الهمامي، ماناش ضحايا احنا مناضلين، استقلالية الهيئة أهم شيء حتى يكون العمل متاعها أساس للتسامح والتجاوز، وهنا ثمة خدمة كبيرة على المستوى النفسي والاجتماعي وحتى التربوي كان لازم تتعمل وما تعملتش حتى تؤدي جلسات الاستماع وظيفتها الصحيحة وما توليش عند البعض بديل على عندي ما نقلك، الجلسات هذي فيها جانب فرجوي، هي عرض لقصص من الواقع تحكي على صراع بين قوي وضعيف، يعني تتوفر فيها مواصفات التراجيديا، هذاك علاه الأثر اللي تخليه في نفس المشاهد هو أقرب لفكرة التطهر الموجودة في المسرح اليوناني موش فكرة الطهارة بالماء والصابون.

الشيخ يفذلك ويرطب في الجو، المشكل في جماعتو اللي شادين الفوط والقباقب ويعيطو: اللي شاح يلبس.


طلّع التيليكوموند عند اشكون؟

عبد الحليم حافظ ومرفت أمين

عبد الحليم حافظ ومرفت أمين

سيّب من يدك التيليكوموند حطّ ثمة…

غريبة ، احنا نتفرجو في فيلم أبي فوق الشجرة في نسختو الجديدة، بطولة الفتى الوسيم قنبلة السينما العالمية يوسف الشاهد وتأليف الكاتب الكبير راشد الغنوشي وإخراج قيدوم الشاشة الفضية الباجي قايد السبسي، فيلم فيه تسعة وتسعين بوسة، حسبناهم من وقت عبد الحليم ونادية لطفي، لا، لا، نادية لطفي موش لطفي زيتون. احنا نتفرجو في الفيلم شايخين، ويا لندرى شكون بدل القناة، م البوس والتعنيق طلعلنا راس ريكوبا وجماعتو قدام محكمة سوسة، الفيلم هذا حتى أفلام المقاولات متع السينما المصرية في الثمانينات خير منو، ع الأقل تلقى فيهم منطق، والمافيا تعمل كل شيء خارج ع القانون أما عمرها ما تتجاوز العدالة، إذا لزم رئيس العصابة يتفاهم مع واحد يشريه بالفلوس بش يعترف بالجريمة ويلبسها في بقعتو، المهم ما ثماش جريمة بدون عقاب حتى في السينما…
سيّب التيليكوموند حطّ غادي،
كان وفى فيلم أبي فوق الشجرة شوفولنا فيلم آخر، والا خليونا نتفرجو في خمسينية التلفزة التونسية هاوك يعديو في إبحث معنا، اش كون حطّ الياغرتة في الفريجيدار، ياحسرة على عبد المجيد لكحل، وعلى كولومبو هاك اللي يلبس كبّوط طويل ويتكيّف ياسر، تعديه فرانس 2 في القوايل وتلقانا من سطح لسطح نركبو في الكساكس بش نتفرجو فيه

 سيّب التيليكوموند، يزي م اللعب، الفيلم اللي حطيتوهولنا ماسط، ما فيهش منطق، علّمتونا ملّلي احنا صغار اللي قاتل الروح ما عندو وين يروح، جايين توة تبدّلوا في أقوالكم.

التيليكوموند عند اشكون؟ يا دكتور، سيّب من ايدك، رجّع الصفا لبلاصتها خلينا نكمّلوا الفيلم.

التعليقات على طلّع التيليكوموند عند اشكون؟ مغلقة more...

آش نعملو بيها السينما؟

عصفور سطح، لفريد بوغدير
عصفور سطح، لفريد بوغدير

السينما في تونس حضبة وشدان صف، دزني وندزك وعرق شرتلة وها الجنش طولو طولين وعرضو عرضين واقف في الباب يقحر للعباد ويعدي فيهم بالواحد بالواحد، حتى لين يغمزو عرفو من شباك التساكر ويقل لو كومبلي بات الرزق، ولداخل، ما تكمل الفرجة كان بقرطاس القلوب وسطل العبيدية وساعات لقطات حيّة من فيلم أبي فوق الشجرة.

صورة من صور سينما الكوليزي في أيام قرطاج السينمائية، الصورة هذي تخليك تفكر ألف مرة قبل ما تطيّح قدرك وتخليك تسأل: علاه احنا هكة،  تجبد تصويرة قديمة متع تونس أربعين سنة لتالي، تقول وين مشاو الناس هاذم وعلاه خلاو بلاصتهم للفوضى والتبلبيز، باب بحر والشوارع اللي دايرين بيه كانوا مهرجانات ثقافة على طول العام وين تمشي ما تلقى كان الكتب والجرائد والاسطوانات، في دواير المسرح البلدي الممّو متع الثقافة التونسية تلقاهم حاطين الحطة كل عشية في قهوة باريس والا الفلورونس والا رواق يحيى للفنون بحذا البالماريوم، منامة عروسية، صورة زمنية ما يعرفوهاش أولاد مفيدة اللي تربّاو في  حوانت الشاوارما وحلو عينيهم على نصب العظم المروّب والملاوي.

زوز م الناس هاك النهار يتناقشوا ، واحد منهم آخر فيلم شافو هو “عصفور سطح” اللي تعدا عندو خمسة وعشرين سنا لتالي، موش هذا المشكل، المشكل أنو يفتي وموش عاجبتو السينما التونسية يعتبرها سينما الكاسة والحمام، كليشيه يخدمو عليه جماعة اكبس من هاك العام. الجماعة اللي لو كان تحللهم في العريض شوية توة يقولولك السينما حرام.

اللي يحب السينما يحب الحياة هذاك علاه برشة ناس شايخين على المشاكل التنظيمية في أيام قرطاج السينمائية، لأنها تتماشى مع رؤيتهم الظلامية واللي تتلخّص في كلمة وحدة: اش نعملو بيها السينما؟

التعليقات على آش نعملو بيها السينما؟ مغلقة more...

يجيك السّبت وتتحاسب

الحملة الانتخابية

الحملة الانتخابية

اليوم 26 أكتوبر يتعداو عامين على الانتخابات اللي كونت مجلس نواب الشعب الحالي، الانتخابات هذيك أنهات المرحلة التأسيسية ودخلت الترويكا اللي كانت في حالة موت سريري التاريخ بعد ما تفرض على حكومة النهضة التخلي ع الحكم وتكونت حكومة المهدي جمعة الي وصلتنا ل26 أكتوبر واللي كانت ثمرة حوار وطني جابلنا جائزة نوبل للسلام.

المسافة اللي قطعناها في الانتقال الديمقراطي، فيها برشة أحداث غيرتلنا حياتنا، خصوصا في السياسة والمجتمع المدني والإعلام وحق المواطن في التنظم والتعبير، ثمة حاجات موش ممكن إنكارها، الديمقراطية تتشاف بالعين المجردة وما تتخباش.
في المقابل الوضع الاقتصادي صعيب، المديونية غلاء الأسعار، تراجع قيمة الدينار، البطالة، الإضرابات، هروب المستثمرين، وعجز الحكومات المتعاقبة على إيجاد حلول جذرية لمشاكل التهرب الجبائي والاقتصاد الموازي والفساد
حدث في مثل هذا اليوم، خزرة قصيرة للريتروفيزور، ما فيها باس، ابن خلدون قال التاريخ لا يزيد في ظاهره عن الاخبار لكنه في باطنه نظر وتحقيق. والرابحين في انتخابات 26 أكتوبر ألفين واربعطاش، يلزمهم اليوم ياقفو قدام المرايا ويشوفو رواحهم اش عملوا في ها العامين، يتذكروا اش قالوا للناخبين واش عملولهم، يشوفو حزبهم الي كان حزب واحد ووولى حزبين وإذا ما تاقفش الأمور عند حدها ممكن يولي ستين حزب بعد ثلاثة سنين ، جماعة النداء بالذات معنيين بها المناسبة هذي حتى وإن كانت غير رسمية وما تسوى شيء مقارنة بتواريخ أخرى أكثر رمزية، بالمناسبة، يمشيو يتفقدو هاك المرا اللي بكا على خاطرها الرئيس في حملتو الانتخابية  وقال موش معقول عندها ثلاثة اشهر ما ذاقتش اللحم، يظهرلي من وقتها ما عاودتش ذاقتو.
إذا هوما نساو، الناخبين ما ينساوش ويا ميت الجمعة يجيك السبت وتتحاسب.


التعليقات على يجيك السّبت وتتحاسب مغلقة more...

آش لزّ حمّة يغني؟

محمد جمور يصافح راشد الغنوشي

محمد جمور يصافح راشد الغنوشي

حزب الوطنيين الديمقراطيين عمل بيان مستعجل، عبر فيه على استياءو من نشران حركة النهضة تصويرة القيادي في الحزب محمد جمور يصافح في راشد الغنوشي. وفسر لأتباع حزبو بش ما يفهموش وضعية التلبس هذي بالغالط، أنو تلاقى هو والشيخ صدفة في السفارة الألمانية في الاحتفالات بعيد ألمانيا الوطني،  وانو اخلاقو ما تسمحلوش بش يتعدى ويعمل روحو ما شافوش.

بش نفهمو السياق مليح الوطد موش مختلف فقط مع  النهضة لأنها تمثل الإسلام السياسي اللي هو ضدو لكن كذلك لأنو يعتبر الترويكا ما تحاسبتش والدوسيات محلولة وملطخة بالدم، من جهتها حركة النهضة تصنف الوطد يسار استئصالي وفك ايدي من شوشتك.

صورة المصافحة والبيان ما ينجمو كان يخيبو الظن ويخليو ابسط مواطن يزيد يكفر بالسياسة و يقول: توة هذا فاش لاهين؟  لا خير في اللي ماشي في بالو جاب الصيد من وذنو بها التصويرة وبش يدخل الوطد بعضو كيف ما فتق أحزاب أخرى من بعضها ولا خير في اللي طاح للعبة وهبط مستواه. حكاية فارغة،

الوضع الصحيح في الديمقراطيات يقوم على الاختلاف بين الأحزاب في التصورات والبرامج ، هذاك علاه تفرح كيف تلقى اليسار في تونس يعارض التوجه الرأسمالي لبقية الأحزاب اللي يغنيو في غناية وحدة كيف المجموعة الصوتية وراء صندوق النقد الدولي، والاتحاد الأوربي،

والناس عاقدة النوارة في المعارضة لأنها تحكي بلغة أخرى تنجم تكون تحلم لكن ما يسالش الحلم ضروري للناس بش يتنفسو

اهمية التصويرة موش في المصافحة بين الإسلامي والماركسي لكن في وجودهم مع بعضهم في عيد جمهورية ألمانيا، هكة تتقرا التصويرة ورمزيتها وتخلي الناس يقولوا  الطبقة السياسية تفرقها الكراسي وما توحدها كان السفارة الأمريكية والا الألمانية.
اش لز حمة يغني؟

التعليقات على آش لزّ حمّة يغني؟ مغلقة more...

هزّ ساق تغرق الأخرى

سوق الملابس المستعملة في تونس

سوق الملابس المستعملة في تونس

الفريب خط أحمر الناس الكل مللي سمعو بقرار منع استيراد الملابس المستعملة وخصوصا النساء وهوما يحضرو في ارواحهم للثورة 2.0 اللي برشة ناس تستنى فيها بش تركب عليها ، برشة ناس من اللي فاتتهم الثورة الأولى ما لقاوش فيها بلاصة، والا ركبو على بكري وهبطتهم الانتخابات.
لكن ما تخافوش أزمة الفريب كيف ازمة الكيوسكات و أزمة قرقنة وبرشة أزمات أخرى تحكم فيها مفاوضات اللحظة الأخيرة، تشويق وشدان انتباه وحرب أعصاب، ومن بعد تتحل

مفاوضات اللحظة الأخيرة  تبدا م الصباح  وتفوت نصف الليل، بعد ما توفى الآجال والإضراب يولي من تحصيل الحاصل، المتفاوضين يتعبو وعينيهم تتسكر وأعصابهم تترخى بالنوم وكل واحد فيهم يتمرج بالتاليفونات مرتو تطلب فيه، اية وينك روحتش كملتش ها المفاوضات اولادك يتعاركو جيب خبزة، مثبت اللي انت مع الوزير الى آخره من هاك الجو متع حراير تونس، وقتها بالضبط يوصلو الجماعة للحل ويتفض المجلس ويا ناس ما كان باس وتصبح البلاد رايضة وننساو الحكاية.

فيلم قديم، كيف هاك الأفلام اللي تعديها التلفزة في المناسبات شوية ميلودراما على شوية غناء وشطيح على شوية ضغوطات فيسع ما تتنسى على شوية قضايا ولجان تحقيق كيف الروقارات حاشاكم تتحل وما تتسكرش، نهار اثنين يطلعلنا وزير يحكي على تراجع النمو وارتفاع المديونية وعلى بارونات التهريب والإجراءات الموجعة اللي نسمعو بيها وما ريناهاش والناس الكل تستنى في راس الشهر، كيف هاك المشهد الأخير متع أبطال الفيلم ماشيين جايين قدام غرفة العمليات لين يخرج الطبيب وهو ينشف في يديه ويقلهم الشهر هذا هاو دبرناهالكم الشهر الجاي شوف وشوف.

هز ساق تغرق الآخرى، البلاد ماشية بالقدرة وما كذبش اللي قال شادينها أولياء الله الصالحين.

التعليقات على هزّ ساق تغرق الأخرى مغلقة more...

الهندام والعقلية

زيارة والي نابل الفجئية لبلدية الحمامات

زيارة والي نابل الفجئية لبلدية الحمامات

زيارة والي نابل لبلدية الحمامات والتوبيخ اللي عملو للموظفين أكيد بش يعجب برشة ناس يحبو الدولة تحمر عينيها لكن المسألة ما تفرحش ياسر.

شنية الحكاية هي، الوالي ما عجتوش لبسة الموظفين لأنهم يمثلوا الدولة وطلب من المسؤولين الكبار في البلدية يهبطو منشور ويمنعوا أي موظف من حطان ساقو في الخدمة اذا ما كانش في مظهر لائق.

اش كون ما تعجبوش الحكاية هذي؟

أنا نرى اللي المشهد هذا فيه برشة استغلال نفوذ واذا حبينا نلطفوها شوية نقولوا افراط في استعمال النفوذ وهذي مشكلة برشة موظفين عموميين في تونس، أحيانا عون الحرس والا الشرطة  يوقف كرهبة مولاها عامل مخالفة، يشوفلو اوراقو، في عوض مباشرة يطبق القانون ويعمرلو الخطية يحلو محاضرة في الأخلاق حتى لين يمشي معاه في الثنية  ويبدا يرخص في روحو  سامحني عندك حق انا غالط أية عديهالنا المرة هذية وماعادش نعاود صنعتي.

في الدول المتقدمة علينا، قتال الأرواح، ماعندكش الحق تصورلو وجهو، القانون يعاقبو على عملتو ولكن يحفظلو  حقوقو، أما احنا عندنا ثقافة الشوهة، والفضيحة والشماتة هذاك علاه الموظف اللي هندامو ما عجبش الوالي وقع اذلالو والتشهير بيه.
زيارة الوالي تنجم تكون باهية أما تصويرها بالفيديو من غير تغطية وجوه الموظفين اعتداء صارخ على حقوق المواطن الأساسية وتعدي على حرمتو لكن احنا مع الأسف حقوق الانسان اختصرناها في  عمليات التعذيب داخل السجون ومراكز الايقاف وما نجمناش نردوها ثقافة كاملة وتتقرا حتى في المدارس.

نزيدك زيادة مشهد الوالي وهو يكش وينش في البلدية يذكرنا بزيارات بن علي الفجئية في بداياتو. وما نتصورش اللي هيبة الدولة يلزمها بالضرورة تساوي الخوف والذل؟ ولذلك سيد الوالي قبل ما نحسنو الهندام هات نغيرو العقلية.

التعليقات على الهندام والعقلية مغلقة more...

امشي بالنيّة وارقد في الثنيّة

تصريحات أسامة الملولي  بخصوص  مقابلتو للشيخ راشد الغنوشي بعد ما رجع م الألعاب الأولمبية تدخل في باب الحرية الشخصية، لكنها في تعطينا فكرة على كيفية الانخراط في الأحزاب السياسية.
في الحقيقة وقت اللي كان عنا حزب واحد في البلاد الأمور كانت أسهل من هكا، ماكانش مطلوب منك تمشي للحزب، الحزب هو اللي يجيك، وحتى كان ما عندكش فلوس تدفع حق الانخراط يدفعو عليك، الشعب المهنية ماكانتش مقصرة. في عقلك يصبرو عليك.

راشد الغنوشي يستقبل أسامة الملولي

راشد الغنوشي يستقبل أسامة الملولي

وانت بطبيعتك ماكش صاحب مشاكل وتمشي الحيط الحيط تشترك في شعبة الخدمة وتزيد احتياطيا تشترك في شعبة الحومة على ما يأتي اشكون يعرف ع البلا. واشكون يعرف على استُفيد.

السياسة كانت ساهلة، موش مطلوب منك تعرف أي شيء ع الحزب، المهم الحزب هو اللي يعرف عليك كل شيء ، اش تاكل، اش تشرب، وقتاش تقوم، وقتاش ترقد، قداش تحط من طابع سكر في القهوة وقداش لازمك وقت بش تشربها، مالا!
في المقابل، الحزب ما يطلب منك شيء، فقط تحلّ عينيك  ووذنيك على قد ما تقدر وتكون حاضر في المعامع الكبيرة، في استقبالات سيادتو مثلا م الفجاري تشري جريدة بش تقصّر الوقت وكسكروت ودبوزة ماء، وتفك بلاصتك في كار الكبانية مع المناضلين الصحاح، متع رفع التحديات والشوالق وتمدّ وجهك في الصف الأول منين يتعدى سيادتو وياقف للماجورات والطبّالة.

الناس كرهت السياسة م الانتهازية، اما اليوم كل شيء تبدّل، الأحزاب كثرت وكل حزب عندو ثنية، كان عندك توندونس قومية عليك بجمال عبد الناصر والقضية الفلسطينية، كان عندك توندونس شيوعية عليك باللحية والدنقري والبيرية، كانك م المناضلين الصحاح اللي هراتلهم سراولهم كيران الكبانية، احفظ قصار السور وطلع البدر علينا وارقد في الثنية.

التعليقات على امشي بالنيّة وارقد في الثنيّة مغلقة more...

Copyright © 1996-2010 آراء حرة. All rights reserved.
View My Stats iDream theme by Templates Next | Powered by WordPress